Querschnitt durch die Basler Schnitzelbänke 2005 (Ausschnitt)

Dr Papscht isch scho zitterig, aber stäärbe derf är nit
Wills denn jo e Waal fir dr Nochfolger git
Isch ain gwäält, kunnt e Räuchli uss em Petersdom
Aber Rauche isch syt neischtem verbotte in Room
(Schnäggedysse)


E baar Milliöönli sin nimm doo
Das Gäld isch halt irgendwie abhande koo
Mir froogen is, wieso der Behring ins Gfängnis goot?
Anderi sitze doch au no im - Swiss Verwaltigsroot!
(die Haiggle)


Dr Tutanchamun het vyyl Gäld noch Baasel gloggt
Het s Fluggi haim gnoo, ooni dass en epper frogt.
Är hoggt uff d Schnurre, sitzt mit Bänder gfesslet doot im Sarkophaag
Dasch en Ussländer, wie-n-en dr Blocher maag.
(Dootebainli)


Ych ha das Kunschtwärgg schnäll begriffe:
zmittst in Paris an Blocher schiffe!
Und trotzäm find ychs birrewaich -
dä isch doch immun - geege jeede Saich!
(d Filzluss)


S hänn unseri "Wätter - Maitli"sacht
im Färnseeh wirgglig Fortschritt gmacht.
Si dien sich nämmlig oohni Bschisse,
sich jetzt bim Staggele nimmi bisse!
(Wäschpi)


Sin Si allergisch uf d SVP
und nämme wäge däm Kamilletee?
Trinke Sie Rhywasser, das macht Sinn:
S het Anidepressiva drin.
Diagnose: Vo dr SVP git's sone Huffe,
do muesch dr ganzi Rhy ussuffe.
(Doggter FMH)


Wie me sym Maitli nur "Tsumani" saage kaa
Mir finde s zwoor nit schlimmer als "Angelika"
Sy kind noch Katastrooffe z dauffe isch bi uns kai Neiikait
Wil me z Baasel alle Glaine "Bush-i" sait.
(Dootebainli)


(aus: NZZ, Zürich, 19. Februar 2005)